მონაცემთა გაცვლის სააგენტოს მიერ ორგანიზებულ სამუშაო შეხვედრაზე ელექტრონული მთავრობის, ღია მმართველობისა და საჯარო ადმინისტრირების საკითხებს განიხილავენ
29 სექტემბერი, 2015

საქართველოს იუსტიციის სამინისტროს მონაცემთა გაცვლის სააგენტოს ორგანიზებით, სასტუმრო „რუმს თბილისში“ ორდღიანი სამუშაო შეხვედრა გაიხსნა, რომელიც ელექტრონული მთავრობის, ღია მმართველობისა და საჯარო ადმინისტრირების საკითხებს ეძღვნება.

ზემოაღნიშნული მიმართულებების განვითარებას დიდი მნიშვნელობა აქვს როგორც სახელმწიფოსთვის, ისე მისი თითოეული მოქალაქისთვის. საჯარო ადმინისტრირებაში თანამედროვე მიდგომების დამკვიდრება და ღია მმართველობის პრინციპების გაზიარება აახლოებს ქვეყანას ევროატლანტიკურ სივრცესთან, ხოლო ელექტრონული მმართველობის პლატფორმა, რომელიც საჯარო სერვისების ელექტრონული ფორმით გამოყენების შესაძლებლობას იძლევა, ამარტივებს მოქალაქის სახელმწიფო სტრუქტურებთან ურთიერთობის პროცესს.

სამუშაო შეხვედრის მიზანი მიმდინარე წლის ზაფხულში შემდგარი ,,ფაქტების შემსწავლელი მისიის“ მუშაობის შედეგების შეჯამებაა, რომლის ფარგლებშიც ესტონელი და ფინელი ექსპერტები სხვადასხვა სახელმწიფო უწყებაში, მათ შორის მთვრობის ადმინისტრაციაში, იუსტიციის სამინისტროში, მონაცემთა გაცვლის, სახელმწიფო სერვისების განვითარებისა და საჯარო რეესტრის სააგენტოებში გამართული შეხვედრების დროს გაეცნენ საჯარო ადმინისტრირების რეფორმის, ელ-მმართველობისა და ღია მმართველობის მიმართულებებით საქართველოში არსებულ ვითარებას.

სამუშაო შეხვედრაზე, რომელშიც მონაწილეობას იღებენ სხვადასხვა სახელმწიფო უწყების წარმომადგენლები და უცხოელი ექსპერტები, განიხილება ესტონეთისა და ფინეთის მხარდაჭერით „აღმოსავლეთ პარტნიორობის“ ქვეყნების შესაძლებლობების ზრდის საკითხები ისეთი მიმართულებებით, როგორებიცაა ჩართულობითი დემოკრატია, ღია მმართველობა და ეფექტიანი ელექტრონული სერვისები.

„ელექტრონულ მმართველობას „ღია მმართველობის პარტნიორობის“ ფარგლებში განსაკუთრებული მნიშვნელობა ენიჭება. სწორედ ამიტომ არის მნიშვნელოვანი ასეთი ტიპის სამუშაო შეხვედრები, რათა მოგვეცეს შესაძლებლობა ჩვენს უცხოელ პარტნიორებთან ერთად შევაფასოთ განვითარების ტემპი და მიმართულება და, შესაბამისად, გამოვიტანოთ სწორი დასკვნები სამომავლო საქმიანობის დაგეგმარებისთვის“, - აღნიშნა ირაკლი გვენეტაძემ, საქართველოს იუსტიციის სამინისტროს მონაცემთა გაცვლის სააგენტოს თავმჯდომარემ.

მონაცემთა გაცვლის სააგენტოსთან ერთად, სამუშაო შეხვედრის თანაორგანიზატორია „პადოსის“
(PADOS) პროექტი, რომელიც ფინეთის საჯარო მმართველობის ინსტიტუტის მიერ შეიქმნა და მიზნად ისახავს „აღმოსავლეთ პარტნიორობის“ ქვეყნებში (საქართველო, აზერბაიჯანი, სომხეთი, ბელარუსი, უკრაინა და მოლდოვა) მმართველობის გამჭვირვალობისა და ღიაობის პრინციპების გაუმჯობესების ხელშეწყობას.